يعنى ايه حلم؟
فى كتابات الأقدمين تصور الأدباء أن هناك عالم سحرى خاص تأتى منه الأحلام .. عالم لا ينتمى لعالمنا الملموس ..كل شىء فيه مباح .. ما يشغلك + عقدك الشخصية التى لم تفصح بها لأحد أبدا + خبرات حياتك اليومية هى المواد الخام التى يصيغها عقلك الباطن فى مصنع ذلك العالم السحرى ليخرج فى النهاية بشريط يشبه شريط السينما يتم عرضه أثناء نومك لتشاهد ما يشبه فيلم عالى الجودة فنية .. يميل للمواربة فى السرد .. البطل الأساسى فيه هو أنت ..
ربما اذا كنت عالى المزاج تجد الفيلم كوميديا .. اذا كنت محبطا ستجده تراجيديا .. اما اذا كنت متقل العيار فى الأكل أو نمت من غير غطاء
ستجده ينتمى للمدرسة السريالية فى السينما حيث الهلوسة والعبث واللامعقول هم اسم اللعبة
ستجد نفسك طائرا ومعك جيفارا يتعلق ببنطلونك بينما تحلق خالتك خلفك ويغنى الملك ريتشارد قلب الأسد ليسليك.. ستجد أى حاجة وكل حاجة..
واذا كنت رائق المزاج وحاولت تعرف تفسير الحلم ستنجح فى هذا
فالعقل الباطن لا يلهو معك .. ومصنع العالم السحرى مش فاتحينه عشان يسليك
كل شىء فى الحلم وله تفسيره ومنطقيته بس اللى يفهم بقى
المشكلة تكمن فى هؤلاء الذين يريدون للعالم السحرى أن يغزو حياتهم
نحن يا سادة نعيش فى عالم غبى .. عالم قذر ..قبيح ..محدووووووووود
الجسد فى الواقع هو جسد فعلا .. واذا أردت أن تفهمه فستجد شرحا مستفيضا لتشريح الجسد وعلم وظائف الأعضاء والجهاز العصبى السيمبثاوى وكل الكلام دة
لكن الجسد فى الحلم مش جسد .. حاول فى الحلم الجاى انك تركز فى شكلك فى الحلم بيبقى عامل ازاى .. مش بيكون انت أوى..
بتكون أشبه بفكرة مبهمة عنك .. من غير تفاصيل مرهقة .. بتكون أشبه باالى انت عارفه عن نفسك .. عن روحك الداخلية .. مش عن جسدك اللى انت بتلمسه وانت صاحى..
لو أردت فهم جسدك فى الحلم مش هاينفعك كتاب التشريح .. هينفعك أكتر كتاب شعر ..
حلمى من زمان أن العالم السحرى اللى جوة كل واحد فينا يطغى على العالم المحدود اللى احنا عايشينه .. عايز نبقى أفكار .. نبقى هالات .. نبقى نور
..
نفسى نتخلص من تفاصيل الواقع اللى مالهاش لازمة ونتطلع لعالم أسمى .. أجمل .. هنشوف الدنيا بشكل تانى خالص
Subscribe to:
Post Comments (Atom)
No comments:
Post a Comment